Исфайрам дарыясынан 40 жаштагы аялдын сөөгү табылды. ӨКМден билдиришкендей, куткаруучуларга суудан аялдын денеси жаткандыгы тууралуу маалымат түшкөн.
Маалыматка караганда, 5-февралда жерине беш куткаруучу тартылып, суудан чыгарылып, милицияга өткөрүлүп берилген.
Ал аял 1983-жылы туулган жаран экендиги белгилүү болгон.
Облустук милициянын маалыматына таянсак, Кадамжай районунун Көтөрмө айыл аймагынын тургуну милицияга кайрылып, арызында 2023-жылдын 2-февраль күнү саат 08:30 чамасында аялы Кадамжай шаарына барып, даары алып келемин деп үйдөн чыгып кеткен бойдон кайра келбегенин билдирген.
Аталган маалымат боюнча милиция тарабынан жарандын жүргөн жерин аныктоо максатында жүргүзүлгөн иш-чаранын жүрүшүндө 2023-жылдын 5-февраль күнү саат 14:00 чамасында Үч-Коргон айылынан өткөн Исфайрам дарыясынан аял кишинин жансыз денеси табылган. Маркумду жолдошу дагы тааныган.
Окуя болгон жерге ыкчам-тергөө тобу барып, сырттан кароо жүргүзүү учурунда киши колдуу жаракаттар аныкталган эмес. Аталган факты боюнча соттук-медициналык экспертиза дайындалып, текшерүү иштери жүрүп жатат.
