Кечээ тажик жарандары Үч-Төбө айылында жер алдынан суу түтүк өткөрүп жатканда кыргыз чек арачылары келип, ишти токтотууну талап кылышкан. Бирок алар кайым айтышып туруп алгандыктан асманга ок атылган.
БИШКЕК, 26-окт. — Sputnik. Тажикстандын жарандары такталбаган чек ара тилкесинде орнотуп жаткан суу түтүктөрүн демонтаж кыла баштады. Бул тууралуу Мамлекеттик чек ара кызматы кабарлады.
Ага ылайык, аталган кызматтын төрагасынын биринчи орун басары Абдикарим Алимбаев кыргыз-тажик чек арасындагы кырдаалды турукташтыруу үчүн күч түзүмдөрүнүн жетекчилери менен жыйын курган.
«Бүгүнкү сүйлөшүүлөрдүн жыйынтыгы боюнча саат 14:50дө тажик тарап кечээ такталбаган мамлекеттик чек ара тилкесинде орнотуп жаткан суу түтүктөрүн демонтаж кыла баштады», — деп айтылат маалыматта.
Полковник Алимбаев чек арага канатташ аймактын калкын коргоого жана мамлекеттик чек аранын бардык тилкелеринде чыр-чатактардын алдын алууга багытталган чараларды көрүү керектигин белгилеген.
Чечилбеген көйгөй болбойт! Жапаров Чек ара кызматынын төрагасына жолукту
Кыргыз-тажик мамлекеттик чек ара тилкесинин Үч-Дөбө жергесинде кырдаал туруктуу деп мүнөздөлөт.
Эске салсак, кечээ, 25-октябрда, саат 17:00дөр чамасында тажик жарандары Баткен облусунун Үч-Төбө айылынан чек ара аркылуу жер алдынан суу түтүк өткөрүп баштаганда, кыргыз чек арачылары тактала элек аймактагы ишти токтотууну талап кылышкан. Бирок тажик тарап баш ийбей кайым айтышканда, эскертүү катары асманга ок атылган. Ошондон кийин түтүк өткөрүү иши токтотулуп, эки өлкөнүн чек ара өкүлдөрү сүйлөшүү жүргүзө башташкан.
