Нөшөрлүү жаандан улам жабылган СОХ – КАН – ЗАРДАЛЫ жолу кум-шагылдардан тазаланып, каттам ачылды. Бул тууралуу Салам Медиага ӨКМдин Баткендеги башкармалыгынан билдиришти.
Маалыматка ылайык, тазалоо иштерине №2 жол тейлөө ишканасынан 1 экскаватор тартылып, натыйжада саат 09:00дө унаа жол толук тазаланып, каттам эки тараптуу ачылган.
Эске салсак, кечээ 10-апрелде жаап өткөн жаандын кесепетинен Дара айыл аймагына жакын жайгашкан кокту-колоттордон сел суулары агып, Сох – Кан – Зардалы унаа жолунун 10-11-чакырым аралыгын кум-шагылга толтурган. Мындан улам унаа жол убактылуу жабылган.
