Баткен облусунун күч түзүмдөрүнүн аскер кызматкерлери катышкан, коррупцияга каршы күрөшүүгө багытталган тегерек стол өткөрүлдү.
Тегерек стол Баткен гарнизонунун аскер прокуратурасы тарабынан коомдо коррупциялык жүрүм-турумга карата келишпестикти калыптандыруу, коррупцияга каршы аракеттенүү мыйзамдарын жаштарга жеткирүү, бул багытта жүргүзүлгөн жумуштарды коомчулукка жайылтуу максатында өткөрүлгөн.
Иш-чарада алгач коррупцияга каршы аракеттенүүнү жөнгө салуучу ченемдик укуктук актылар жана бул багытта кайсы мамлекеттик органдар күрөшөрү тууралуу маалымат берилди. Андан соң жемкорлуктун алдын алуу боюнча күч түзүмдөрүндө кандай иш-чаралар алып барылып жаткандыгы талкууга алынды.
9-декабрь — коррупцияга каршы күрөшүүнүн эл аралык күнү. Бул дата 2004-жылы Бириккен Улуттар Уюмунун Башкы ассамблеясында дүйнөнүн 95 өлкөсүнүн лидерлеринин катышуусунда өткөрүлүп, макулдашууга кол коюлган. Макулдашууда адал акчаны арамдоо, пара берүү өңдүү мыйзам бузууларга бөгөт коюу жолдору каралган.
