“Акыркы коңгуроо” салтанаты өлкө боюнча 25-майда саат 9.00дө өтөт. Бул тууралуу Билим берүү жана илим министри Каныбек Иманалиевдин 2022-2023-окуу жылын уюшкандыкта жыйынтыктоо жана салтанаттуу иш-чараларды өткөрүү убагында бүтүрүүчүлөрдүн өмүрүнүн коопсуздугун сактоо боюнча буйругунда жазылат.
Жалпы билим берүү уюмдарынын директорлоруна салтанаттуу иш-чараларды өткөрүүгө мыйзамсыз түрдө акча жана башка чогултууларды жыйноого, ошондой эле бүтүрүүчүлөр жана алардын ата-энелеринин катышуусунда “Акыркы коңгуроо” салтанатынан сырткары иш-чараларды уюштурууга тыюу салынат.
“Акыркы коңгуроо” салтанаттуу иш-чарасын өткөрүүдөгү коопсуздук чараларын камсыз кылуу жоопкерчилиги билим берүү уюмдарынын жетекчилерине жүктөлөт.
Белгилей кетсек, Баткен облусу боюнча 2022-2023 окуу жылын 5 миң 555 окуучу бүтүрөт. Анын ичинен 2 миң 481и эркек балдар болсо, 3 миң 074үн кыздар түзөт.
Автор: Сабира Бакирбек кызы
