Үстүбүздөгү жылдын 6-сентябрында Баткен районунун Кара-Булак айылында “Дааназат” Коомдук Фондунун “Зомбулуксуз жашоо” долбоорунун алкагында “Ынтымактуу үй бүлө” сынагы болуп өттү.
Сынакка Баткен шаарынын жана районунун аймагынан 10 үй-бүлө катышты.
Алгач үй-бүлө мүчөлөрү “Зомбулуксуз жашоо” деген темада биргеликте тарткан сүрөтүнүн маанисин чечмелеп беришти.Ошондой эле “Үй-бүлөдө орун алган маселени чыр чатакка жеткирбей чечүү ” боюнча суроолорго, үй-бүлөлөр кырдаалдан чыгуу аракеттерин айтып беришти.
Сынактын “Эркин тема”номинациясы боюнча үй-бүлөлөр өздөрү каалаган багытта өз өнөрлөрүн көрсөтүп, позитивдүү маанай тартуулашты.
Катышуучулар Нурила Жуманова жана Нургазы Жайнаковдор, бул иш чара үй-бүлө баалуулуктары тууралуу маалыматтар менен азыктандырган, руханий жактан пайдалуу иш чара болгонун белгилешти.
Сынактын соңунда, калыстар тобу менен катышуучулар ортосунда, үй-бүлөдөгү зордук зомбулуктун чыгуу себептери, балдардын өсүп өнүгүүсүндөгү чыр- чатактардын таасири, зордук зомбулуктун алдын алууда үй-бүлө мүчөлөрүнүн туура мамилеси тууралуу талкуу болду.
Жыйынтыгында бардык катышкан үй-бүлөлөргө уюштуруучулар тарабынан белектер тапшырылды.
“Иш-чаранын максаты коомчулукта зордук зомбулуктун түпкү себептерин алдын алуу жана үй-бүлө мүчөлөрүнүн өз ара мамилелерин бекемдөө” дейт уюштуруучулар;
Маалыматтык кампания АКШнын Өкмөтүнүн каржылоосу менен Saferwold жана Эл аралык толеранттуулук үчун фонду тарабынан колдоого алынып, милициянын жана калктын социалдык шериктештиги долбоорунун алкагында ишке ашты.
