Баткен облусунда катуу жааган жаандан улам бала бакчаны, турак үйлөрдү жана 10 гектарга жакын эгин талаасын сел каптады. Бул тууралуу Өзгөчө кырдаалдар министрлигинин басма сөз кызматы билдирди.
Билдирүүгө ылайык, Кызыл-Кыя шаарында мөндүр аралаш жааган жаандан улам Жусубалиев көчөсүндөгү балдар бакчасынын жана 1 турак үйдүн короосуна суу толуп, 6 куткаруучу тартылды.
Материалдык чыгым жана жабыр тарткандар болгон жок.
Ал эми Баткен районунун Таян айылында сел кетүүчү сайдан сел жүрүп, 1 чакырымга жакын ички чарбалык жолдун айрым бөлүктөрү, 10 гектарга жакын эгин талааларын сел суусу баскан. Болжол менен 1 чакырым арык кум, шагылга толгон.
Жеринде аймактык жарандык коргонуу комиссиясы тарабынан тактоо иштери жүргүзүлүүдө деп айтылат маалыматта.
