Президенттин Баткендеги өкүлү Абдикарим Алимбаев менен Өзбекстандын Фергана облусунун хокими Хайрулло Бозаров Шахимардан аймагында жолукту. Бул тууралуу облустук бийликтен кабарлашты.
Маалыматка ылайык, жолугушууда Баткен жана Фергана облустарынын соода-экономикалык кызматташтыгын өнүктүрүү маселелери талкууланды.
Ал эми буга чейин эки өлкө ортосунда кызматташууну кеңейтүү жөнүндө комплекстүү программага («Жол Картасы») кол коюлган.
Анын алкагында, 2023-жылы Баткен облусу менен Өзбекстандын облустары ортосундагы соода-экономикалык мамилелердин жыйынтыгында экспорттун көлөмү 55,1 млн АКШ долларын түзгөн, ал эми Өзбекстандан 21,2 млн АКШ долларына товар импорттолгон.
Ошондой эле, 2024-жылдын биринчи кварталында Баткен облусунун Фергана облусу менен товар жүгүртүүсү 1,1 миллиард сомду түздү.
Учурда Баткен облусунун сырткы байланыштар багытында, кошуна Өзбекстандын аймактары менен кызматташуусу биринчи орунда келе жатат.
