Мурдагы вице-премьер-министр Жеңиш Разаков кызмат абалынан кыянаттык менен пайдалануу жана алдамчылыкка шектелип кармалды. Бул боюнча Ички Иштер Министрлигинен маалымдашты.
Маалыматта Жеңиш Разаков алдоо жолу менен 1 млн АКШ долларын алган факты боюнча козголгон кылмыш иши тергелип жаткандыгы белгиленет.
2022-жылдын 20-сентябрында ИИМдин Тергөө кызматына Б.А. аттуу жаран кайрылып, мурдагы вице-премьер-министр Жеңиш Разаковго мыйзамдуу чара көрүп берүүнү суранып, арызын жазган.
Жабырлануучунун жазган арызында 2017-жылдын ноябрь, декабрь айларында кызмат абалынан пайдалануу менен анын ишенимине кирип, ишкердик ишмердүүлүк жүргүзөбүз деп 1 млн АКШ долларын алып бербей койгондугун билдирген.
Ага ылайык, 2023-жылдын 24-январында Жеңиш Разаков кармалып, Бишкек шаардык милициясынын убактылуу кармоочу жайына киргизилген. 26-январда Биринчи май райондук сотунун чечими менен анын баш коргоо чарасы аныкталып, 2023-жылдын 24-февралына чейин тергөө абагына камакка алынды», — деп айтылат маалыматта.
Козголгон кылмыш иши боюнча тергөө иштери уланууда.
Белгилей кетсек Жеңиш Разаков, Баткен облусунун губернатору жана облустук ички иштер башкармалыгынын башчысы кызматтарын да аркалаган.
