Олимпиада оюндарынын күмүш байге ээси, эркин күрөш боюнча дүйнөнүн эки жолку чемпиону Айсулуу Тыныбекова 11-12-декабрь күндөрү Баткен облусунда болот. Бул тууралуу КР Президентинин Баткен облусундагы ыйгарым укуктуу өкүлүнүн басма сөз кызматы билдирди.
А.Тыныбекова иш сапардын алкагында КР Президентинин Баткен облусундагы ыйгарым укуктуу өкүлү Абдикарим Алимбаев менен жолугушат. Ошондой эле Лейлек районунун Максат айылында мектеп окуучулары менен жолугуп, андан соң Баткен районунун Ак-Сай айылында жаш балбандар үчүн мастер-класс өткөрүүсү пландалууда. Мындан тышкары Баткен шаарындагы Ж.Бөкөнбаев атындагы орто мектебине бараары, жаш спортчулар жана шаар тургундары менен чоң жолугушуу болоору айтылууда.
Белгилей кетсек, ушул сааттарда Айсулуу Тыныбекова Ош аэропортуна келип түшүп, Баткенге жол тартканы маалымдалды.
