Атайын кызмат 1993-2002-жылдар аралыгында чет элдик банктар менен келишип алган коррупциялык схемалардын негизинде Кыргызстандан 1 миллиард доллар өлчөмүндө насыя-акча каражаты чыгарылып кеткенин ырастаган документтер табылганын жарыялап, тергөө амалдарын баштады.
Мурдагы президент Аскар Акаевдин тушунда кырктан ашуун насыя мамлекеттик үлүшү бар ишканаларга өкмөттүн кепилдиги менен алынып, мамлекеттин алтын-валюта корунун бир бөлүгү күрөөгө коюлуп, насыя акча уурдалып, ал эми күрөөдөгү алтын чет элдик банктардын колунда калганы көрсөтүлгөн. Бул боюнча Москвадагы Акаевдердин үй-бүлөсү менен байланышууга мүмкүн болбоду.
Улуттук банктын мурдагы төрагасы, мурдагы финансы министри Марат Султанов ал ишканалар атайын банкрот болуп, насыялар төлөнбөй, алтын күрөөдө калганын ырастады.
«Сол чөнтөккө» кымырылган насыя
Улуттук коопсуздук боюнча мамлекеттик комитет 1993-2002-жылдары Кыргызстандын ошол кездеги жогорку кызмат адамдары чет элдик банктар менен келишип алып, тамак-аш, жеңил өнөр жайы, фармацевтика, тоо, кен, таштандыны кайра иштетүү боюнча заводдорду өнүктүрүү деген шылтоо менен алынган насыяларды кымырып алган фактыларды аныктады.
Буга байланыштуу тергөөнүн корутундусунда «Кара-Балта тоо-кен комбинаты» АК, «Жибек-Жолу» АК, «Казкоммерцбанк», «Жылдыз» АК, «Кыргызпотребсоюз», «Жанар» АК, «Чүй агроөндүрүш компаниясы», «Ала-Тоо» мейманкана-ресторандар комплекси, «Кыргыз Агробизнес» компаниясы, «Буудай» мамлекеттик ишканасы өкмөттүн кепилдиги менен чет элдик банктардан бир миллиард доллар өлчөмүндө 40тан ашуун насыя алган.
