Баткенде куткаруучулар белин сындырып алган нидерланддык туристти тоодон түшүрдү. Бул тууралуу Өзгөчө кырдаалдар министрлигинин басма сөз кызматы билдирди.
Маалыматта, “Централ Азия Тур” туристтик фирмасы Өзгөчө кырдаалдар министрлигине Баткен районундагы Миң-Теке тоосунда турист бутун кокустатып, белин сындырып алгандыгын билдирип, жабыркаган жаранды коопсуз жайга түшүрүү үчүн тик учак сурап кайрылган.
Турист Нидерланддан келген 1986-жылы туулган Текстор Борис аттуу эркек киши болгон.
«Бишкек шаарынан ӨКМдин Авиациялык ишканасынын тик учагы саат 09:35те учуп чыгып, туристти алып түшүп, Ош шаарынын аэропортунда тез жардам кызматкерлерине өткөрүп беришкен. Тик учак саат 17:55те туруктуу жайгашкан ордуна келип конду», — деп айтылат маалыматта.
