5-апрель түнү, Өзбекстан Кыргызстанга чек ара чырынан каза болгондордун сөөгүн өткөрүп берди. Бул тууралуу КР УКМКнын Чек ара кызматынан билдирди.
Белгилей кетсек, кечээ кыргыз-өзбек чек арасында курал колдонуу менен чыр чыгып, анын натыйжасында Кыргызстандан Өзбекстанга ат менен баасы 20 миң доллар турган аткезчилик жүк алып өтүүгө аракет кылган 2 жаран каза болгон, калган чек ара бузуучулар КРнын аймагына качып өтүүгө үлгүрүшкөн.
Кыргызстандын чек ара кызматы чыр-чатактын кесепетинен каза болгон Кыргызстандын жарандары Аксы районунун Дейрес айылынын 1984-жылы жана 1991-жылы туулган тургундары экенин билдирет.
Белгилүү болгондой, каза болгон жарандар Өзбекстанда туулуп өскөн жарандар болуп, 2012-жылы Кыргызстандын жарандыгын алышкан.
Орун алган чыр-чатактын натыйжасында Кыргызстандын чек ара кызматы аткезчилик жүктөрдү ташууга катышкан жарандары издөө боюнча комплекстүү иш-чараларды жүргүзүп жатат, деп айтылат маалыматта.
