Кечээ, 26-октябрь күнү Баткен шаарында 1999-2000-жылдардагы окуяларда аскердик милдетин аткарып жатып курман болгон жоокерлер эскерилди. Бул тууралуу шаардык бийликтен билдиришти.
Ага ылайык, эскерүү иш чарасына жергиликтүү бийлик өкүлдөрү, ишкана-мекемелердин жетекчилери, коогалаңдын катышуучулары, шаар тургундары жана маркумдардын үй-бүлөлөрү катышты. Эстеликке гүлчамбар коюлуп, куран окулду. Ушундай эле эскерүү иш-чаралары облустун башка аймактарында да өткөрүлдү.
1999-2000-жылдардагы Баткен согушуна 6 миңдей жоокер, 400дөй жаран катышкан. Алардан 130дан ашык адам жараат алып, 53 адам курман болгон.
1999-2000-жылдарда «Өзбекстан ислам кыймылынын» террордук согушкерлери менен Кыргызстандын аскерлери кагылышып, Баткен согушунан кийин гана Баткен облусу Ош облусунан бөлүнүп өзүнчө облус болуп түзүлгөн.
