Лейлекте райондук билим берүү мекемесинин балансында турган жер участогун мыйзамсыз сатууга шектелип “Кадастр” мекемесинин адиси, Раззаков шаарынын мэриясынын мурдагы кызматкери жана Раззаков шаарынын вице-мэри кармалды. Бул тууралуу Улуттук коопсуздук боюнча мамлекеттик комитетинен билдиришти.
Ага ылайык, кармалгандар, Раззаков шаарындагы №4 мектеп-гимназиясынын балансындагы 140 чарчы метр жер тилкеси түз сатуу-сатып алуу келишимин түзүү жолу менен Раззаков шаарынын тургунуна 40 миң сомго мыйзамсыз сатышкан.
“ «Эксперт Групп» ЖЧКсынын көз карандысыз экспертинин корутундусуна ылайык, аталган жер тилкесинин иш жүзүндөгү баасы аны сатуу учурунда 1 миллион 200 миң сомдон ашык болгон. Учурда шектүүлөр, облустук милициянын убактылуу кармоочу жайына киргизилди. Кылмышка тиешеси бар башка кызмат адамдарына карата тергөө амалдары жүргүзүлүүдө.” – деп жазылат маалыматта.
