Кадамжай районундагы автогазоблок заводунун курулушу 80%га бүткөрүлдү. Бул тууралуу облустук бийликтен кабарлашты.
Ага ылайык, бул ишкана герман технологиясы менен курулуп жаткан Кыргызстандагы алгачкы газобетон заводу болуп саналат.
Долбоор Президенттин Баткендеги өкүлүнүн алдындагы бизнести жана инвестицияларды өнүктүрүү боюнча кеңешинде каралып, заводду куруу үчүн айыл өкмөтү тарабынан 5,0 га жер аянты ажыратылган. Мындан сырткары Кыргыз-Орус өнүктүрүү фондунан каражат берилген.
Бул өндүрүш ишканасынын курулушу менен биринчи этапта эле 150дөй жумуш орду түзүлөт. Экинчи этапта жалпы 200дөй жумушчу алынат.
Ишкананын сметалык баасы 14,5 млн. АКШ долларын түзөт.
