Швейцария өкмөтү чек ара жаңжалынан жабыркаган Баткен облусуна жардам катары 450 миң доллар бөлөт. Бул тууралуу аталган өлкөнүн Бишкектеги элчилигинен билдиришти. Маалыматка караганда, бул каражатка Бириккен Улуттар уюмунун Дүйнөлүк азык-түлүк программасы тамак-аш жана азык-түлүк жагынан көмөк көрсөтөт.
Быйыл сентябрь айында Тажикстандын куралдуу кол салуусунда Баткен облусунун аймагында жалпысынан 661 турак-жай жабыркап, анын 423ү жашоого таптакыр жараксыз болуп калган. Үй-жайсыз калгандар убактылуу баш калкалоочу жайларда, же жакындарынын үйлөрүндө күн кечирүүдө. Бийлик аларга кыш келгенче, 2 ай убакытта жаңы үй куруп берүүгө убада берген. Бирок жабыркаган жарандар учурда курулуш иштери өтө эле жай жүрүп жатканына кабатыр.
