Бүгүн, 8-августта UFC`нин чемпиону, мушкер Хабиб Нурмагомедов Кыргызстанга келди. Бул тууралуу EFC 49 турниринин уюштуруучуларына таянып Кабар агенттиги жазды.
Нурмагомедов Кыргызстанга Eagle футбол клубунун президенти Шамиль Завуров, ошондой эле “Хасбик” каймана аты менен таанымал россиялык белгилүү блогер Хасбулла Магомедов менен бирге келди.
Хабиб Нурмагомедов Бишкек шаарында 10-августта өтө турган Eagle Fighting Championship лигасынын аралаш мушташ боюнча турниринин ардактуу коногу болот. Турнир саат 18:00дө башталат.
Спорттук иш-чара 14 беттешти камтыйт, алардын эң башкысы Кыргызстандык Бусурманкул Абдибаит уулу менен Орусиялык Руслан Магомедовдун беттеши болуп саналат.
